Cab Service: మందుబాబులకు క్యాబ్ సర్వీస్.. బార్లకు ప్రభుత్వం కీలక ఆదేశాలు

 

Cab Service: మందుబాబులకు గోవా ప్రభుత్వం గుడ్ న్యూస్ తెలిపింది. మందుబాబులకు తప్పనిసరిగా క్యాబ్ సర్వీస్ ఏర్పాటు చేయాలని ఆదేశాలు జారీ చేసింది. మద్యం తాగిన వారిని తమ సొంత వాహనాల్లో పంపించకూడదని, వారికి క్యాబ్ ఏర్పాటు చేయాలని ఆదేశాలు జారీ చేసింది. తమ కస్టమర్లకు క్యాబ్ ను ఏర్పాటు చేయాల్సిన బాధ్యత బార్లు, రెస్టారెంట్లు, క్లబ్‌ల యాజమాన్యాలపై ఉందని గోవా రవాణశాఖ మంత్రి స్పష్టం చేశారు. అందరూ నిబంధనలు పాటించాలని ఆదేశించారు.

ప్రధానాంశాలు:

• మందుబాబులకు క్యాబ్ సర్వీసులు
• బార్లు, రెస్టారెంట్స్‌లకు గోవా ప్రభుత్వం కొత్త నిబంధన
• సురక్షితంగా ఇంటికి పంపాలని ఆదేశాలు

డ్రంకన్ డ్రైవ్ వల్ల రోడ్డు ప్రమాదాలు ఎక్కువగా జరుగుతున్నాయి. మద్యం మత్తులో డ్రైవింగ్ చేస్తూ మందుబాబులు ప్రాణాలు కోల్పోతున్నారు. పీకల్లోతు మద్యం తాగి డ్రైవింగ్ చేయడం వల్ల వారి ప్రాణాలతో పాటు ఇతర ప్రాణాలకు కూడా ముప్పు వాటిల్లుతుంది. డ్రంకన్ డ్రైవ్‌పై పోలీసులు ఎన్ని చర్యలు తీసుకున్నా.. ప్రభుత్వాలు ఎన్ని చట్టాలు తీసుకొచ్చినా కొంతమంది మందుబాబులు నిర్లక్ష్యంగానే వ్యవహరిస్తున్నారు. మద్యం తాగి డ్రంకన్ డ్రైవ్‌లో దొరికిపోతున్నారు. డ్రంకన్ డ్రైవ్ లో పట్టుబడ్డ వారికి భారీ జరిమానా విధించడంతో పాటు తీవ్రత ఎక్కువగా ఉంటే వాహనం సీజ్ చేయడం, జైలుశిక్ష విధించడం లాంటి కఠిన నిబంధనలు కూడా అమల్లో ఉన్నాయి.

కానీ మందుబాబులు మాత్రం వీటిని పట్టించుకోకుండా ట్రాఫిక్ నిబంధనలను ఉల్లంఘిస్తూనే ఉన్నారు. మద్యం తాగి డ్రైవింగ్ చేయడం వల్ల ఎక్కువగా రోడ్డు ప్రమాదాలు జరుగుతున్నాయని భావిస్తున్న గోవా ప్రభుత్వం తాజాగా కీలక నిర్ణయం తీసుకుంది. మందుబాబులకు తప్పసరిగా క్యాబ్‌ సర్వీసులను ఏర్పాటు చేయాలని గోవా ప్రభుత్వం ఆదేశాలు జారీ చేసింది. ఈ మేరకు అన్ని బార్లు, రెస్టారెంట్లు, పబ్‌ల యాజమాన్యాలను రవాణాశాఖ మంత్రి మౌవిన్ గోడిన్హో ఆదేశించారు. తాగిన తర్వాత కస్టమర్లను సురక్షితంగా ఇంటికి పంపించాల్సిన బాధ్యత బార్లు, రెస్టారెంట్లు, పబ్‌ల యాజమాన్యాలపై ఉందన్నారు.

మందుబాబులను తమ సొంత వాహనంలో ఇంటికి వెళ్లనీయకుండా చేయాలని, యజమాన్యాలే ఒక క్యాబ్ ను అద్దెకు తీసుకుని తమ కస్టమర్లను ఇంటికి జాగ్రత్తగా పంపేలా చర్యలు తీసుకునేలా గోవా ప్రభుత్వం కొత్త నిబంధనలు తీసుకొచ్చింది. ఈ నిబంధనను తాము కఠినంగా అమలు చేస్తామని, డ్రంకన్ డ్రైవ్ కేసుల విషయంలో మరింత కఠినంగా వ్యవహరించాల్సిందిగా అధికారులను కోరుతున్నట్లు మంత్రి గోడిన్హో తెలిపారు. ట్రాఫిక్ ఉల్లంఘనకు పాల్పడిన వారు జరిమానా నుంచి తప్పించుకునేందుకు తమకు తెలిసిన బ్యూరోక్రాట్స్ సపోర్ట్ తీసుకుంన్నారని, ఇది వెంటనే ఆగిపోవాలని రవాణాశాఖ మంత్రి సూచించారు.